2100 nýir Heimsforeldrar UNICEF

Síðastliðið föstudagskvöld fór fram söfnunar- og skemmtiþáttur UNICEF sem bar heitið Búðu til pláss en þátturinn var sendur út í tilefni af 20 ára afmæli UNICEF á Íslandi. Markmið þáttarins var að fjölga Heimsforeldrum UNICEF og bæta þannig líf milljóna barna í neyð.

Við hjá Sýn lögðum málstaðnum að sjálfsögðu lið líkt og við höfum gert síðastliðin ár, nú bæði með öruggum fjarskiptum í gegnum símaver Vodafone og þátttöku í útsendingu og framleiðslu þáttarins í gegnum Stöð 2. Þátturinn var sýndur samtímis á Stöð 2, RÚV og í Sjónvarpi Símans og því um sögulegan sjónvarpsviðburð að ræða.

Það er óhætt að segja að markmiði söfnunarinnar hafi verið náð en starfsfólk Sýnar, auk fjölda sjálfboðaliða, tók á móti símtölum frá rúmlega 2100 nýjum Heimsforeldrum.

Við viljum þakka UNICEF fyrir að treysta okkur fyrir þessu verðuga verkefni um leið og við fögnum öllum Heimsforeldrum, gömlum sem nýjum. Enn er hægt að bætast í þann góða hóp og hvetjum við öll þau sem hafa tök á að skrá sig sem Heimsforeldri HÉR og hjálpa þannig börnum í neyð um allan heim.