Samkvæmt rekstrarreikningi námu tekjur félagsins af seldum vörum og þjónustu 21.981 m.kr. samanborið við 21.647 m.kr. á árinu 2024, sem er hækkun um 1,5%. Tap ársins var 634 m.kr. samanborið við tap upp á 1.518 m.kr. árið áður. Á samanburðarárinu 2024 höfðu virðisrýrnun (-1.161 m.kr.) og afkoma af aflagðri starfsemi veruleg áhrif á niðurstöðuna, en engin virðisrýrnun kom til á árinu 2025. Þýðingarmunur er færður yfir á eigið fé og var heildarafkoma ársins tap upp á 638 millj. kr. Heildareignir félagsins námu 30.862 m.kr. í árslok 2025 og lækkuðu um 1% á milli ára (2024: 31.050 m.kr.). Lækkunin skýrist aðallega af lækkun rekstrarfjármuna (-1.688 m.kr.) og annarra óefnislegra eigna (-618 m.kr.) vegna sölu eigna til Sendafélagsins, en var að hluta vegin upp af hækkun veltufjármuna (+906 m.kr.), einkum vegna hærri viðskiptakrafna. Veltufjárhlutfall var 2,1 í lok árs 2025 samanborið við 1,78 í lok árs 2024. Í lok ársins 2025 var eigið fé 8.050 m.kr. og eiginfjárhlutfall var 26,1%. Útistandandi hlutafé í lok tímabilsins var óbreytt frá fyrra ári og nam 2.476 m.kr. bæði í árslok 2025 og 2024. Engin endurkaupaáætlun var í gildi á árinu 2025 og engin eigin bréf voru keypt (2024: 76 m.kr.).