Við notum vefkökur til að bæta upplifun þína á síðunni. Með því að halda áfram að vafra um síðuna samþykkir þú skilmála okkar um notkun á vefkökum, að öðrum kosti getur þú kynnt þér hvernig má stýra notkun þeirra.
9. ágúst 2018
Bretar verðlauna íslenska arkitekta fyrir höfuðstöðvar Sýnar
Opið vinnurými í höfuðstöðvum Sýnar að Suðurlandsbraut
Breska fagtímaritið BUILD hefur verðlaunað íslenska arkitekta hjá Yrki arkitektum ehf. fyrir vinnu þeirra við höfuðstöðvar Sýnar að Suðurlandsbraut 8 sem tímaritið útnefnir bestu innanhússhönnun skrifstofuhúsnæðis ársins 2018. Yrki arkitektar ehf. eru jafnframt útnefndir sem framsæknasta arkitektastofa ársins.
BUILD er mánaðarrit og fjallar um það sem er að gerast í hönnunar- og byggingargeiranum vítt og breitt um heiminn. Þetta er fjórða árið í röð sem tímaritið veitir Arkitektaverðlaun BUILD en með þeim vill blaðið viðurkenna framúrskarandi vinnu og hæfileika hönnuða, verkfræðinga og hugsjónarfólks á heimsvísu. Bæði stór og smá fyrirtæki í mörgum flokkum hljóta náð fyrir augum dómnefndarinnar sem skipuð er fyrsta flokks fagfólki. „Það er alltaf stórkostlegt að fá verðlaun fyrir hönnun á því sem við höfum verið að vinna að. Góð viðurkenning fyrir arkitektastofu,“ segir Ásdís Helga Ágústsdóttir hjá Yrki arkitektum ehf.
Höfuðstöðvar Sýnar að Suðurlandsbraut 8 hafa vakið verðskuldaða athygli fyrir smekklega hönnun sem unnin var með þarfir starfsfólks í fyrirrúmi en mikil vinna var lögð í þarfagreiningu. Í lýsingu Yrkis arkitekta á verkefninu segir að sú greining hafi hjálpað til við skipulag og hönnun innan nýju höfuðstöðvanna. Höfuðáhersla er á sveigjanlegt vinnuumhverfi með mörgum mismunandi starfsstöðvum en markmiðið er að stytta leiðir milli þeirra sem vinna saman og auka skilvirkni í starfi og stjórnun.